RA DÄHNINI MADU̱HTHO̱ NGE RÁN GWATꞌI A RA HNINI NJU NGE RA XE̱KI IDALGO
Yo̱ yuhu u̱ yo̱ jäꞌi ꞌbu̱ꞌa ra hnini Madu̱htho̱ nge i ja bu̱ ja yo̱ tꞌo̱ho̱, i tsimmánho yó̱n nete u̱ yo̱ mengu bu̱.
Ra pa bi thopu̱ nge rá ꞌda̱temahyu ra zäna Mayo nu ra nijä Pentekoste “Ra do̱nꞌwïni jabu̱ ra Ndihi” bi mba bu̱ ja ra däthe bin xixra ꞌda yo̱ kü ra hmepya nge bi ꞌyëkꞌyëi xó̱n ho. Nu a dí zo̱tꞌa nꞌda bu̱ ja ra däthe jatho din ꞌyogwa thoho nꞌda a hyu a goho máhwähi metro, nu a ní mba xo̱htho ran gäi a ꞌne ran gwani a ní mbengi. Ra Florensio rá thuhu a ran gu̱rbi.
MAGUNZA NÁN GWATꞌI A MAꞌBIDA NGE RA RA XE̱KI IDALGO
Nu Magunza, nu ra nijä Pentekoste bim ꞌbe̱tꞌo nꞌda ra dämpe̱ti bin ja a ná nꞌda ꞌne ná yoho ra zäna Mayo, gepu̱ bi mba u̱ yo̱ kü ꞌbu̱pu̱ Madu̱htho̱, Ndohyu, Inxtehe, Ntsꞌinthe, Du̱hxiza, Nju̱tsꞌi ꞌnen Nani. Xó̱n gu ran jäpi bi nu ga̱ bi ꞌbu̱hna ram pe̱ti na. ꞌNe nu u̱ di hokrá tꞌohni ra Nyuhu a rám hmanꞌOjä “Rán neki ra Nyuhu” bi neꞌa rám hmanꞌOjä nge ra Lebitiko nge ntꞌoꞌtꞌi ra Nyuhu, nu yo̱ kü ëmme bin johya nge bi ꞌyo̱hrám hmanꞌOjä nge ntꞌoꞌtꞌi a rá ndese̱. Ra Daniel Cayetano Lorenzo a i ꞌBe̱tꞌo bu̱.
